Չորեքշաբթի, 24 Մարտին, իր աւարտին հասաւ Մեծ Պահքի առիթով տեղի ունեցած Ս. Գիրքի սերտողութիւնը, որ վեց շաբթուան ընթացքին ուսումնասիրած էր Սաղմոսագիրքը։ Սերտողութիւնը կը վարէր Ազգային Առաջնորդարանի Քրիստոնէական Դաստիարակութեան բաժանմունքի վարիչ տնօրէն՝ Շանթ Ա. Սրկ. Գազանճեան։ Աւելի քան 80 հոգիի մասնակցութեամբ, այս յայտագիրը, որ սկսած էր 17 Փետրուարին, առցանց կերպով տեղի ունեցած է Չորեքշաբթի երեկոները, որուն հետեւած է հարց ու պատասխանի բաժին մը։
Շանթ Աւագ Սարկաւագ ներկայացուց տարբեր տեսակի սաղմոսները՝ դրուատիքի ու գոհաբանութեան, ողբի ու խնդրանքի, արքայական, իմաստութեան եւ ապաշխարութեան, վեր հանելով անոնց բանաստեղծական գլխաւոր յատկանիշները։ Ան քննութեան ենթարկեց կարգ մը եբրայերէն կրկնուող բառեր եւ ցոյց տուաւ, թէ ինչպէ՞ս անոնք գրաբարի թարգմանուած են հետեւելով յունարէն Եօթանասնից թարգմանութեան (ողորմած, գթած, բազումողորմ)։ Այդ բառերը Աստուծոյ յատկանիշները կը նկարագրեն եւ յաճախ կը գործածուին Հայ Եկեղեցւոյ աղօթքներուն եւ արարողութիւններուն մէջ։ Ան նաեւ անդրադարձաւ թշնամիներու դէմ ուղղուած սաղմոսներուն։
Դասախօսը ցոյց տուաւ, թէ ըստ Հայ Եկեղեցւոյ աւանդութեան, մեր աղօթական կեանքին մէջ սաղմոսները օգտագործելու երկու ձեւեր կան։ Առաջինը՝ սաղմոսներու շարունակական ընթերցումն է, կարդալով մէկ, երկու կամ աւելի սաղմոսներ ամէն օր, իսկ երկրորդը՝ եօթնօրեայ արարողութիւններու շարքին ընթացքին Հայ Եկեղեցւոյ կարդացած սաղմոսներն են, որոնք օրուան տուեալ ժամանակի մը եւ արարողութեան մը հետ կապուած են, եւ որոնց ցանկը հայթայթուեցաւ մասնակիցներուն։
Շանթ Աւագ Սարկաւագ շեշտեց, որ Սաղմոսագիրքը աղօթքի դպրոց մըն է, Եկեղեցւոյ առաջին աղօթագիրքը, որուն պէտք է ծանօթանայ ամէն ոք, որ կ՚ուզէ աղօթել ըստ Սուրբ Գիրքի կանոններուն։