Տօներ

ՏՕՆ ԿԱԹՈՂԻԿԷ ՍՈՒՐԲ ԷՋՄԻԱԾՆԻ

Այս Կիրակի, 6 Յունիս, Կաթողիկէ Սուրբ Էջմիածնի տօնն է։ Ս. Գրիգոր Լուսաւորիչ կառուցած է Ս. Էջմիածինը՝ վիրապէն ելլելէ ետք, այն վայրին վրայ, որ ոսկեայ մուրճով նշուած էր Տիրոջ կողմէ տեսիլքի մը ընթացքին։ Տօնը կը նշէ Հայ Եկեղեցւոյ հաստատումն ու հեթանոսութեան վերջը։ Աւելի քան 1700ամեայ Էջմիածինը ցարդ իր գոյութիւնը պահած հայ քրիստոնէական ամենահին վայրն է եւ չորս սիւներով, գմբէթաւոր ու խաչաձեւ եկեղեցւոյ հնագոյն օրինակը՝ քրիստոնէական ճարտարապետութեան մէջ։ Արտաքին պատերու քանդակները հայ քրիստոնէական քանդակագործութեան հնագոյն օրինակներուն մաս կը կազմեն։