Արժպ. Տ. Պետրոս Քհն. Շիթիլեան՝ հոգեւոր հովիւ Ս. Գրիգոր Լուսաւորիչ եկեղեցւոյ (Ինտիըն Օրչըրտ, Մասաչուսեթս), նաեւ կարեւոր գործունէութիւն ունի իբրեւ նուագավար։ Անցեալ 25 Նոյեմբերին, ան ելոյթ ունեցած է վարելով London Mozart Players նուագուխմբը անգլիական մայրաքաղաքի երաժշտական լաւագոյն սրահներէն մէկուն՝ St. John’s Smith Squareի մէջ։ Նուագախումբը ներկայացուցած է Մոցարթի, Մենտելսոնի եւ Պէթհովէնի գործեր։ Համերգին տեսագրութիւնը եւ այլ յարակից նիւթերը յառաջիկայ Փետրուարին տրամադրելի պիտի ըլլան նուագախումբի կայքէջին մէջ։
Տ. Պետրոս իր երաժշտական ուսումը ստացած է Երեւանի Ռոմանոս Մելիքեանի անուան երաժշտական ուսումնարանին մէջ՝ խմբավարի մասնագիտութեամբ, եւ ապա Ս. Փեթերպուրկի երաժշտանոցին մէջ՝ նուագավարի մասնագիտութեամբ։ Անոր նուագավարի ձիրքերը մեծապէս գնահատուած են միջազգային մամուլին կողմէ։