ՃՈՐՃ ԱՒԱԳԵԱՆ (ծնունդ՝ 15 Մարտ, 1919)
Ճորճ Աւագեան ամերիկահայ յայտնի ձայնագրութիւններու արտադրիչ եւ արուեստագէտներու ներկայացուցիչ եղած է, լայն համբաւի տիրացած՝ ամերիկեան ձայնագրութեան մեծ ընկերութիւններու իր աշխատանքով 1939-էն մինչեւ 1960ական թուականները։ Ամերիկեան ձայնագրութեսն ընդարձակման ու զարգացման կարեւոր ոյժ մը եղած է։
Ճորճ (Գէորգ) Մեսրոպ Աւագեան ծնած է 15 Մարտ, 1919ին, Ռուսաստանի Արմաւիր քաղաքը (Հիւսիսային Կովկաս)։ 1923 թուականին ընտանիքով տեղափոխուած են Միացեալ Նահանգներ։ 1941-ին աւարտած է Եէյլ համալսարանը։ 1939-ին կատարած է ճազի իր առաջին ձայնագրութիւնը։ Եղած է ճազի շատ յայտնի երաժիշտներու՝ Տէյվ Պրուպէքի, Լուի Արմսթրոնկի, Մայլզ Տէյվիսի եւ ուրիշներու արտադրիչը։ 1946-1958-ին Columbia Records ընկերութեան աշխատելով, առաջին երկար (long play) ձայնապնակները եւ կենդանի ձայնագրութիւնները արտադրած է աշխարհի մէջ։ Առաջիններէն եղած է, որ ճազի պատմութեան համալսարանական դասընթացք մը վարած է (Նիւ Եորք համալսարան, 1948)։
1948-ին, Աւագեան ամուսնացած է ապագայ նշանաւոր ջութակահար Անահիտ Աճէմեանի հետ (1925-2016), որուն հետ ունեցած է երեք զաւակներ եւ 68 տարուան ամուսնութիւն մը։
1957 թուականին, Աւագեան Միացեալ Նահանգներու ձայնագրութեան արուեստի ազգային ակադեմիայի հիմնադիր անդամ եղած է, իսկ 1966-1967ին՝ նախագահ։ Ամերիկեան ճազի ամենամեծ հեղինակութիւններէն մէկը համարուած է։ 1961 թուականին «Կրեմմի» մրցանակին արժանացած է «Լաւագոյն ալպոմ» անուանակարգին մէջ։ 1960-1980-ական թուականներուն կազմակերպած է ճազի բազմաթիւ երաժիշտներու համերգային շրջապտոյտները Խորհրդային Միութեան մէջ։ 1984-ին Մալթայի ասպետներու ասպետութեան կոչումը ստացած է, իսկ 1990-ին՝ խորհրդային Լենինի շքանշանը։ Արժանացած է նաեւ ամերիկեան եւ ֆրանսական բազմաթիւ պարգեւատրումներու։ 1998 թուականին այցելած է Հայաստան եւ մասնակցած՝ Երեւանի ճազի առաջին միջազգային փառատօնին։
Ճորճ Աւագեան մահացած է 22 Նոյեմբեր, 2017-ին, Նիւ Եորքի մէջ։