ՌՈՒԲԷՆ ՅՈՎՍԷՓԵԱՆ (ծնունդ՝ 5 Մայիս, 1939)

Ռուբէն Յովսէփեան 1970-ական թուականներուն Հայաստանի այսպէս կոչուած «երիտասարդական արձակ»ի յայտնի անուններէն մէկը եղած է։

Ծնած է 5 Մայիս, 1939-ին, Երեւանի մէջ։

1956-ին, աւարտած է Հոկտեմբերեան քաղաքի թիւ 1 միջնակարգ դպրոցը, եւ 1956-57-ին աշխատած է քաղաքի հաստոցաշինական գործարանին մէջ։ 1962-ին աւարտած է Երեւանի պետական համալսարանի երկրաբանական ճիւղը։ 1962-1964-ին աշխատած է իբրեւ երկրաչափ Թուրքմենիստանի մէջ, իսկ այնուհետեւ նուիրուած է լրագրութեան ու գրականութեան։ 1965-ին հրատարակած է վիպակներու եւ պատմուածքներու առաջին հատորը՝ «Որոնումներ» խորագրով։ Աշխատած է իբրեւ «Աւանգարդ» թերթի արուեստի եւ գրականութեան բաժնի վարիչ (1965-1966), «Գրական թերթ»-ի շրջուն թղթակից (1966-1969) եւ «Սովետական գրականութիւն» ամսագրի արձակի բաժնի վարիչ (1970-1974)։ 1968-ին անդամակցած է Հայաստանի Գրողներու Միութեան։

1974-1975-ին ուսանելէ ետք Մոսկուայի բեմագրութեան բարձրագոյն դասընթացքներուն, վերադարձած է Հայաստան եւ երիտասարդական հաղորդումներու գլխաւոր խմբագիր եղած է հեռատեսիլի եւ ձայնասփիւռի պետական կոմիտէին մէջ (1975-1976), իսկ 1976-1979-ին՝ «Եթերում է Երեւան»ը թերթի խմբագրութեան մէջ։ 1980-ական թուականներուն «Սովետական գրող» հրատարակչական գլխաւոր խմբագիր եղած է (1982-1987), 1988-1989-ին՝ Հայաստանի Գրողներու Միութեան քարտուղար, իսկ 1989-ին ստանձնած է «Նորք» (նախկին «Սովետական գրականութիւն») ամսագրի խմբագրութիւնը, զոր վարած է մինչեւ մահը։

Անկախութենէն ետք, քաղաքական դաշտ մտած է, անդամակցելով Հայ Յեղափոխական Դաշնակցութեան, եւ Ազգային Ժողովի պատգամաւոր եղած է (2000-2007)։ 2006-ին արժանացած է Հայաստանի նախագահի մրցանակին, իսկ 2009-ին՝ «Մովսէս Խորենացի» մետալին։ 2014-ին ստացած է Հայաստանի Հանրապետութեան մշակոյթի վաստակաւոր գործիչի տիտղոսը։

Ռուբէն Յովսէփեանի արձակը յատկաշուած է արդիական նիւթերու արծարծումով։ Գլխաւոր գործերն են «Հնձան» (1972), «Ամենատաք երկիրը» (1977), «Ճայերը» (1980), «Ծիրանի ծառերի տակ» (2006) եւ «Նռներ» (2016)։ 1973-ին, իր բեմագրով նկարահանուած է «Հնձան» ժապաւէնը։

Ռուսերէնէ թարգմանած է գոլոմպիացի նշանաւոր վիպագիր Կապրիէլ Կարսիա Մարքէսի «Հարիւր տարուայ մենութիւն» եւ «Նահապետի աշունը» վէպերը, որոնք մեծապէս գնահատուած են։

Մահացած է 27 Հոկտեմբեր, 2016-ին, Երեւանի մէջ։