ՀԱՅՈՑ ՑԵՂԱՍՊԱՆՈՒԹԵԱՆ ՍՈՒՐԲ ՆԱՀԱՏԱԿՆԵՐՈՒՆ ՏՕՆԸ
Վաղը՝ Ապրիլ 24, Հայաստանեայց Եկեղեցին կ՚ոգեկոչէ Հայոց Ցեղասպանութեան Սրբոց Նահատակաց տօնը, որ հաստատուեցաւ տօնացոյցին մէջ հինգ տարի առաջ՝ Ապրիլ 23, 2015ին, նահատակներու սրբադասման առիթով։
Ինչպէս բոլոր սուրբերը, նահատակներուն կը դիմենք, որպէսզի բարեխօսեն մեզի համար, իսկ Եկեղեցին այլեւս հոգեհանգիստ չի կատարեր նահատակներուն համար։ Եկեղեցւոյ բոլոր տօնական օրերը կը նշուին շարականներու երգեցողութեամբ եւ Սուրբ Գիրքէն հատուածներու ընթերցումով։ Մեծի Տանն Կիլիկիոյ միաբանութեան անդամ՝ հոգելոյս Զարեհ Արք. Ազնաւորեանը, 1990ին գրած էր Հայոց Ցեղասպանութեան Սրբոց Նահատակաց նուիրուած շարականները ու անոնց երաժշտութիւնը յօրինած։