Ս. Ներսէս Շնորհալի Հայրապետի վախճանման 850 ամեակին առիթով, Ն.Ս.Օ.Տ.Տ. Արամ Ա. Վեհափառ Հայրապետի տնօրինումով, Կաթողիկոսարանի «Կիլիկիա» մատենադարանը գիտաժողով մը կազմակերպած է, Ուրբաթ, 26 Մայիսին: Հինգշաբթի, 25 Մայիսին, Կաթողիկոսարանի «Շնորհալի» երգչախումբը, որ Հայրապետի վախճանման 800ամեակին առիթով անոր տիտղոսով մկրտուած էր երջանկայիշատակ Խորէն Ա. Կաթողիկոսի կողմէ, կրօնական երաժշտութեան համերգ մը պիտի հրամցնէ Ս. Գրիգոր Լուսաւորիչ Մայր Տաճարին մէջ:
Գիտաժողովին իրենց մասնակցութիւնը պիտի բերեն միաբաններ, Դպրեվանքի ընծայարանի ուսանողներ, լիբանանահայ մտաւորականներ եւ հրաւիրեալներ: Ս. Ներսէս Շնորհալի Հայրապետի 850ամեայ յիշատակը արժանաւորապէս ոգեկոչելու նպատակով գիտաժողովի զեկոյց-ուսումնասիրութիւնները հատորով մը լոյս պիտի ընծայուին:
Մեր մտաւորականները հրաւիրուած են 850ամեակը արժեւորելու եւ մասնակցելու ուսումնասիրութիւններով, զորս պէտք է յղել arekagan1@gmail.com հասցէին։ Նոյն հասցէին հետ պէտք է կապ պահել գիտաժողովի մասնակցութեան եւ ընդհանրապէս 850 ամեակի նշումին առնչուած տեղեկութիւններու համար: