21-22 Յունիսին, ամերիկահայ միացեալ պատուիրակութիւն մը այցելեց Ուաշինկթըն, Հայաստանի ու Արցախի տագնապալի վիճակին հետ առնչուող նոր նախաձեռնութեան մը առիթով։ Այս նախաձեռնութեան նպատակն է ազդեցիկ օրէնսդիրներու ուշադրութեան յանձնել հայ-ատրպէյճանական բանակցութիւններն ու Արցախի մարդասիրական ահաւոր վիճակը, եւ իսկական բազմակուսակցական համաձայնութիւն մը գոյացնել ի նպաստ Հայ Դատին։ Այս նախաձեռնութիւնը սկիզբ տուած էր 21 Յունիսին Քոնկրէսի Թոմ Լանթոսի անուան Մարդկային Իրաւանց Յանձնախումբի՝ Արցախի նուիրուած ունկնդրութեան, որուն հետ զուգադիպած է պատուիրակութեան այցելութիւնը։
Պատուիրակութեան մաս կը կազմէին Թեմիս բարեջան Առաջնորդ՝ Գերշ. Տ. Անուշաւան Արքեպիսկոպոս, Արեւելեան Թեմի (Էջմիածնական) Առաջնորդական Փոխանորդ՝ Գերպ. Տ. Սիմէոն Ծ. Վրդ. Օտապաշեան, Նինա Յովնանեան, Ճուտիթ Սարեան, տոքթ. Ճոն Սարեան, Արլին Սարեան, Քրիստիան Ալեքսանտր, ԱՄՆի մէջ Արցախի Հանրապետութեան մշտական ներկայացուցիչ՝ Ռոբերտ Աւետիսեան, Ամերիկայի Հայ Դատի Յանձնախումբի գործադիր տնօրէն՝ Արամ Համբարեան, Հայ Դատի Յանձնախումբի ծրագրի տնօրէն՝ Ալեքս Կալիցքի, Ամերիկայի Հայկական Համագումարի գործադիր տնօրէն՝ Պրայըն Արտունի, Ս. Լուսաւորիչ Մայր Եկեղեցւոյ հոգաբարձութեան ատենապետ՝ Արմէն Մորեան, Գոնկրէսի նշանակեալ կապ՝ Տրիւ Պօուլինկ, եւ Մանհաթընվիլ գոլէճի քրիստոնէական փիլիսոփայութեան ամպիոնի վարիչ՝ դոկտ. Շըպան Նաշ-Մարշալ։
Պատուիրակութիւնը հանդիպած է Ներկայացուցիչներու Տան Արտաքին Գործերու յանձնախումբի ատենապետ՝ Մայքլ ՄաքՔօլի, նոյն յանձնախումբի Եւրոպայի ենթայանձնախումբի ատենապետ՝ Թոմըս Քին կրտսերի, Մարդկային Իրաւանց Յանձնախումբի ատենապետ՝ Քրիստոֆըր Սմիթի, եւ անդամ՝ Կաս Պիլիրաքիսի, եւ ծերակուտականներ Ճ. Տ. Վէնսի եւ Մարքօ Ռուպիոյի աւագ անձնակազմին հետ։