Թեմիս բարեջան Առաջնորդ՝ Գերշ. Տ. Անուշաւան Արքեպիսկոպոս, եւ Ազգային Վարչութեան Կրօնական ու Քաղաքական Ժողովները ցաւով իմացան, որ փաստաբան Ռոպըրթ Արամ Գալուստեան իր մահկանացուն կնքած է Կիրակի, 12 Մայիսին, 93 տարեկանին։
Հանգուցեալ Ռոպըրթ Գալուստեան ծնած է Ուոթըրթաուն, 29 Հոկտեմբեր, 1930-ին։ Զաւակն էր Փօլ եւ Կրէյս Գալուստեաններու։ 1952-ին վկայուած է Գլարք համալսարանէն։ Գորէայի պատերազմին մասնակցելէ ետք, 1957-ին իրաւագիտութեան դոկտորան ստացած է Պոսթոնի համալսարանէն։ Ամուսնացած է Մարիան Գալուստեանի հետ եւ ունեցած՝ երեք զաւակ։
Իր մասնագիտական վաստակին կողքին, Գալուստեան երկարամեայ մասնակցութիւն բերած է ամերիկահայ կեանքին։ Հայաստանի Անկախութեան Ամերիկայի Կոմիտէի (հետագային՝ Ամերիկայի Հայ Դատի Յանձնախումբ) ատենապետ եղած է, անդամակցելով նաեւ Հ. Յ. Դաշնակցութեան Կեդր. Կոմիտէին։ Ատենապետ եղած է Ուոթըրթաունի Հայ Մշակութային եւ Կրթական Կեդրոնի շինարարութեան յանձնախումբին։ Ամերիկայի Հայկական Համագումարի հիմնադիրներէն եղած է (1972), երկար տասնամեակներ անոր ղեկավար մարմնին մաս կազմելով։ 1997-2010-ին, Հայկական Համագումարին կից Հայկական Ազգային Հիմնարկի (Armenian National Institute) հոգաբարձութեան ատենապետը եղած է։
2015-ին հրատարակած է «Դատեմ՝ հօրս գիւղը» անգլերէն հատորը, որ իր հօր եւ ընտանիքի ծննդավայրի մանրամասն պատմութիւնն է։
2002-ին, Գլարք համալսարանի արդի հայոց պատմութեան եւ Հայոց Ցեղասպանութեան ամպիոնի հիմնադրի՝ Գարոլին Մուկարի խնդրանքով, ամպիոնը կոչուած է անոր ծնողներուն՝ Ստեփան եւ Մարիան Մուկարի, ինչպէս եւ Ռոպըրթ Արամ եւ Մարիան Գալուստեաններու անունով։
Ռոպըրթ Գալուստեան «Կիլիկիոյ իշխան»ի շքանշանին արժանացած է Մեծի Տանն Կիլիկիոյ Կաթողիկոս Ն.Ս.Օ.Տ.Տ. Գարեգին Բ.ի (1980) կողմէ, ինչպէս եւ Հայաստանի Հանրապետութեան «Մխիթար Գօշ» մետալին՝ նախագահ Լեւոն Տէր Պետրոսեանի կողմէ։ Ս. Ստեփանոս եկեղեցւոյ (Ուոթըրթաուն, Մէսէչուսէթս) եկեղեցւոյ բարերար էր եւ Ազգային Առաջնորդարանի «Հիմնասիւն»երէն (Pillar)։
Առաջնորդարանի անունով, Առաջնորդ Սրբազան հայրը իր ցաւակցութիւնները կը յայտնէ հանգուցեալի կողակիցին, զաւակներուն եւ ընտանիքին։ Յուղարկաւորութիւնը տեղի ունեցաւ Հինգշաբթի, 16 Մայիսին, Ս. Ստեփանոս եկեղեցւոյ մէջ (Ուութըրթաուն, Մէսէչուսէթս)։ Փոխան ծաղկեպսակի, նուիրատուութիւններ կարելի է կատարել Ս. Ստեփանոս եկեղեցւոյ, Ամերիկայի Հայկական Համագումարին եւ Հայկական Ծառատունկ Ծրագրին (Armenia Tree Project)։
Աստուած հոգին լուսաւորէ։