«Ս. ԳՐԻԳՈՐ ՏԱԹԵՒԱՑԻ» ԼՍԱՐԱՆԻ ՀԱՆԴԻՊՈՒՄԸ

11-12 Յունուարին, Ազգային Առաջնորդարանի Քրիստոնէական Դաստիարակութեան բաժանմունքը հովանաւորեց «Ս. Գրիգոր Տաթեւացի» ամառնային լսարանի հանդիպումը Ս. Լուսաւորիչ Մայր Եկեղեցւոյ մէջ։ Հանդիպումին ներկայ էին լսարանի վերջին երեք տարիներու 28 աշակերտներ հետեւեալ ծուխերէն՝ Ս. Լուսաւորիչ Մայր Եկեղեցի (Նիւ Եորք), Ս. Գրիգոր Լուսաւորիչ եկեղեցի (Ֆիլատելֆիա, Փէնսիլվէնիա), Ս. Վարդանանց եկեղեցի (Ռիճֆիլտ, Նիւ Ճըրզի), Ս. Ստեփանոս եկեղեցի (Ուոթըրթաուն, Մէսէչուսէթս) եւ Ս. Գրիգոր Լուսաւորիչ եկեղեցի (Նորթ Անտովըր, Մէսէչուսէթս)։

Մայր Եկեղեցւոյ հոգեւոր հովիւ՝ Արժպ. Տ. Մեսրոպ Քհն. Լագիսեան, բարի գալուստ մաղթեց ներկաներուն, ներկայացնելով եկեղեցւոյ հարուստ պատմութիւնը։ Բարշ. Շանթ Ա. Սրկ. Գազանճեան՝ Քրիստոնէական Դաստիարակութեան բաժանմունքի վարիչ, Ս. Գիրքի սերտողութիւն մը վարեց եւ դասախօսեց Նիկիոյ հանգանակի մասին՝ Նիկիոյ Տիեզերական Ժողովի 1700-ամեակին առիթով։ Երէցկին Մակի Գույումճեան՝ լսարանի դասախօսներէն, սորվեցուց երեք շարականներ, իսկ Թալին Լագիսեան եւ Աննա Թէքէեան՝ լսարանի անձնակազմէն, հայրենասիրական երգեր թարմացուցին եւ լսարանի դաստիարակչական բաժնի հիմամբ հարց ու պատասխանի խաղ մը կազմակերպեցին։

Մասնակիցները այցելեցին Ազգային Առաջնորդարանը, ինչպէս եւ Նիւ Եորքի շարք մը յայտնի վայրեր։

Շաբաթ օրուան կարճատեւ արարողութեան մը կողքին, աշակերտները նաեւ մասնակցեցան Կիրակի օրուան ժամերգութեան եւ Ս. Պատարագին, որուն կը նախագահէր Թեմիս բարեջան Առաջնորդ՝ Գերշ. Տ. Անուշաւան Արքեպիսկոպոս։

Յաւարտ Ս. Պատարագին, աշակերտները յուզեցին ծխականները իրենց սրտագրաւ շարականներով ու հայրենասիրական երգերով։ Առաջնորդ Սրբազան Հայրը խօսք ուղղեց աշակերտներուն, ընտանիքներուն եւ համայնքին, շնորհակալութիւն յայտնելով ծնողներուն, որ քաջալերած են իրենց զաւակներուն մասնակցութիւնը, եւ լսարանի անձնակազմին, ինչպէս եւ Արժպ. Տ. Մեսրոպ Քահանային եւ Մայր Եկեղեցւոյ հոգաբարձութեան իրենց հիւրասիրութեան եւ գործակցութեան համար։ Ծրագիրը իր աւարտին հասաւ Ս. Լուսաւորիչ Մայր Եկեղեցւոյ հովանաւորած ճաշկերոյթով։

Ազգային Առաջնորդարանը շնորհակալութիւն կը յայտնէ հետեւեալ նուիրատուներուն. Ս. Լուսաւորիչ Մայր Եկեղեցի, Արժպ. Տ. Վահան Քհն. եւ երէցկին Մակի Գույումճեան, Պետրոս եւ Լիզա Եսայեան եւ Թալին Լագիսեան։ Շնորհակալութիւն պէտք է յայտնել նաեւ ծրագրի հսկիչներուն. Յովիկ Սրկ. Չափանեան (Փէնսիլվէնիա), երէցկին Մակի Գույումճեան, Աննա Թէքէեան (Նիւ Ճըրզի), Թալին Լագիսեան եւ Թամար Լագիսեան (Նիւ Եորք)։

«Ս. Գրիգոր Տաթեւացի» լսարանի 39-րդ շրջանը տեղի պիտի ունենայ 29 Յունիսէն մինչեւ 6 Յուլիս St. Mary of Providence կեդրոնին մէջ (Էլվէրսըն, Փէնսիլվէնիա)։