ՎԵՐԱՄՈՒՏ ՈՒՈԹԸՐԹԱՈՒՆԻ ՄԷՋ

Ուոթըրթաունի հայ համայնքը վերամուտի յատուկ ձեռնարկ մը ունեցաւ Կիրակի, 21 Սեպտեմբերին, երբ աշակերտները, ընտանիքները եւ ուսուցչական կազմերը քով-քովի եկան աղօթքի, համադամ ճաշերու եւ ընկերակցութեան օր մը վայելելու համար։

Խաչվերացի տօնի Անդաստանի աւանդական թափօրը եզրափակուեցաւ յատուկ աղօթքով եւ օրհնութեամբ Ս. Ստեփանոս ամէնօրեայ, շաբաթօրեայ եւ կիրակնօրեայ վարժարաններու աշակերտներուն համար, որմէ ետք տեղի ունեցաւ հանրապետական մաղթանք՝ Հայաստանի անկախութեան 34-ամեակին առիթով։ Դպրոցական խնամակալ մարմինն ու եկեղեցւոյ հոգաբարձութիւնը այնուհետեւ կազմակերպեցին ճաշկերոյթ մը եւ զանազան ձեռնարկներ Արցախ փողոցի եւ եկեղեցւոյ շրջափակին մէջ, որոնք տօնական մթնոլորտ ստեղծեցին։