Անհետացող Դէմքեր՝ Գրիգոր Զօհրապ (Իր Կեանքը եւ Իր Գործը), Արշակ Ալպօյաճեան (թղթակազմ)

Այս գիրքը առաջին անգամ լոյս տեսած էր 1919ին, Մեծ Եղեռնի մեծագոյն զոհերէն մէկուն՝ գրագէտ ու իրաւաբան Գրիգոր Զօհրապի մահէն չորս տարի ետք։ Բանասէր Արշակ Ալպօյաճեանի (1879-1962) հեղինակած այս հատորը առաջին անգամ վերատպուած է 2018ին՝ Մեծի Տանն Կիլիկիոյ Կաթողիկոսութեան հովանաւորութիւնը վայելող «Գէորգ Մելիտինեցի» Գրական Մրցանակի մատենաշարով։ «Նորավէպի իշխան»ին նուիրուած այս առաջին հատորը ամփոփ անդրադարձ մը կը պարունակէ անոր հրապարակագրութեան, գրական հայեացքներուն եւ, ընդհանրապէս, կեանքին ու գործունէութեան, որուն համար հեղինակը մեծապէս օգտուած է ժամանակի մամուլէն, յաճախ մեջբերելով ընդարձակ քաղուածքներ կամ ամբողջ բնագիրը։