Ն.Ս.Օ.Տ.Տ. Արամ Ա. Կաթողիկոս Մեծի Տանն Կիլիկիոյ հրապարակած է յայտարարութիւն մը՝ կոչ ուղղելով հայ ժողովուրդին, թէ՛ Հայրենիքի մէջ եւ թէ՛ ի սփիւռս աշխարհի, որ ոտքի կանգնի ընդդէմ Ատրպէյճանի շղթայազերծած հերթական յարձակման, որ թիրախ դարձուցած է Վարդենիս, Գորիս, Սոթք եւ Ջերմուկ քաղաքները Հայաստանի Հանրապետութեան տարածքին մէջ, Երեքշաբթի, 13 Սեպտեմբերին։ Ատրպէյճանի չպատճառաբանուած յարձակման պատճառով, առնուազն 105 զինուորներ նահատակուած են, իսկ չորս քաղաքացիներ՝ վիրաւորուած։ Թշնամին նաեւ ռմբակոծած է տուներ եւ քաղաքային ենթակառուցուածք։ Ստորեւ կու տանք Նորին Սրբութեան յայտարարութեան ամբողջական բնագիրը։
Այո՛, հայոց բանակին կողքին համահայկական ու համաժողովրդային դիմադրութիւն ցեղապաշտ, արիւնարբու ու յարձակողապաշտ Ատրպէյճանի դէմ: Փաստօրէն այլ ճանապարհ չկայ՝
Երբ 4-օրեայ ու 44-օրեայ պատերազմներով ու ապա շարունակուող յարձակումներով Ատրպէյճան կը փորձէ ինքնիշխան ու խաղաղ ապրելու մեր ժողովուրդին իրաւունքը խլել:
Երբ անտեսելով միջազգային օրէնքը, թէ՛ պատերազմի եւ թէ՛ զինադադարի շրջանին, կը փորձէ դիմել անմարդկային ու անարգ միջոցներու:
Երբ արհամարհելով քաղաքական բանակցութիւնները, կը փորձէ զէնքի ոյժով ինքզինք պարտադրել:
Երբ իր անպատասխանատու մօտեցումով, յարձակողապաշտ ոճով եւ բիրտ միջոցներով կը փորձէ իր տեսակէտները պարտադրել նոյնիսկ միջազգային համայնքին…:
Ո՛չ, կարելի չէ ընդունիլ անմեղ զոհերով ու պատերազմական գերիներով հպարտացող ներկայ ժամանակներու ցեղասպանին շարունակուող ոճիրը:
Ո՛չ, կարելի չէ ընդունիլ Հայաստանին հողային ամբողջականութիւնը ու անվտանգութիւնը բիրտ ոյժի գործածութեամբ վտանգող Ատրպէյճանի նկրտումները:
Ո՛չ, կարելի չէ ոչ-քաղաքակիրթ միջոցներով մեր ժողովուրդի արժանապատուութիւնը վիրաւորող պետութեան մը անպատասխանատու վերաբերումը:
Արդ, Հայաստանի Հանրապետութեան հողային ամբողջականութիւնը ու գերիշխանութիւնը վտանգող ճակատագրական այս կացութեան դիմաց՝
Անհրաժեշտ է դուռը թակել բոլոր բարեկամ եւ ոչ-բարեկամ երկիրներուն, մօտաւոր եւ հեռաւոր ղեկավարներուն, շրջանային թէ միջազգային կազմակերպութիւններուն:
Անհրաժեշտ է իրաւական միջոցներով անպատժելիութեան քողը վար առնել Ատրպէյճանի վրայէն:
Անհրաժեշտ է հայոց բանակի կողքին համահայկական ու համաժողովրդային դիմադրութեան զանգը հնչեցնել: Սա մեր ժողովուրդին արդար իրաւունքն է: Իր գոյութիւնը, անկախութիւնը, անվտանգութիւնը պահելու կոչուած ժողովուրդի մը հաւաքական դիմադրութիւնը մարդկային իրաւունքներուն անբաժան մասը կը կազմէ:
Ատրպէյճանը պէտք է իմանայ, որ Հայաստանի ու Արցախի կողքին իր դիմաց կը գտնուի նաե՛ւ Սփիւռքը, մեր ո՛ղջ ժողովուրդը՝ իր ամբողջ կարողականութեամբ. հետեւաբար, ան չի կրնար մեր ժողովուրդին հաւաքական կամքը ընկճել:
Ատրպէյճանը պէտք է իմանայ, որ մեր ժողովուրդի հին ասացուածքին համաձայն «որ ո՛չ լուիցէ բանիւ, լուիցէ գանիւ» (ան որ խօսքով չի հասկնար, գաւազանով միայն կը հասկնայ):
Փաստօրէն ներկայ քաղաքակիրթ աշխարհին մէջ Ատրպէյճանը խօսքի լեզուէն չ՚ուզեր հասկնալ: Հետեւաբար, անոր հետ հարկ է խօսիլ գաւազանի լեզուով՝ դիմելով համաժողովրդային դիմադրութեան բոլոր միջոցներով, բոլոր մարզերէն ներս ու բոլոր մակարդակներու վրայ:
Հարկ է դիմել համահայկական դիմադրութեան ամրապնդելով մեր ներքին միասնականութիւնը՝ Հայաստան-Արցախ-Սփիւռք ղեկավարներու շուտափոյթ ու միատեղ հանդիպումով եւ մեր ողջ ազգին մարդուժին ու ներուժին համախմբումով:
ԱՐԱՄ Ա. ԿԱԹՈՂԻԿՈՍ