Ֆրանսահայ նշանաւոր գրագէտ Շահան Շահնուրի (1903-1974) կեանքն ու գործը հայ ընթերցողին ներկայացնող այս աշխատութեան հեղինակը՝ գրադատ ու մանկավարժ Գրիգոր Շահինեան, իր յառաջաբանին մէջ կը գրէ.
«Ամբողջական կենսագրութիւն մը եւ լրիւ մատենագիտութիւն մը կազմած ըլլալու պատրանքը չունիմ բնաւ։ Կատարելագործելի սեւ աշխատանք մըն է պարզապէս իմս, որ կրնայ նիւթ հայթայթել բոլոր անոնց, որոնք յետագային պիտի ուզեն կազմել Շահնուրի վաւերական եւ ամբողջական կենսագրութիւնը։ Ուզեցի պարզապէս օգտուիլ առիթէն, քանի դիպուածով կրցած էի ձեռքի տակ ունենալ վաւերագիրներու ամբողջ դէզ մը, որ կրնայ մէկտեղուած չմնայ ապագային»։
