Մեր Դժուար Ժամանակների Մեծ Հայը. Մեսրոպ Արքեպիսկոպոս Աշճեան (թղթակազմ)

Թեմիս նախկին առաջնորդ՝ լուսահոգի Մեսրոպ Արք. Աշճեանի յիշատակին կազմուած այս հատորը (կազմողներ՝ Աշոտ Մելքոնեան, Յովիկ Մկրտիչեան եւ Հռիփսիմէ Աշճեան) բաղկացած է երեք մասերէ։ Առաջին բաժինը կ՚ընդգրկէ մամուլի մէջ լոյս տեսած կամ յատկապէս գրուած՝ զանազան եկեղեցականներու, մտաւորականներու եւ Մեսրոպ Սրբազանի մտերիմներու սրտի խօսքը։ Երկրորդ բաժնին մէջ ընդգրկուած են Սրբազան Հօր անունը կրող գրադարանի (Հայաստանի Գիտութիւններու Ազգային Ակադեմիայի պատմութեան հիմնարկին մէջ) յուշամատեանէն, զանազան գիտնականներու հարցազրոյցներէն քաղուածքներ, ինչպէս եւ Մեսրոպ Սրբազանէն խոհեր։ Վերջին բաժինը կը ներկայացնէ Մեսրոպ Արքեպիսկոպոսի նամականին։