Մշոյ Գեղամ (Գեղամ Տէր Կարապետեան, 1865-1918) գաւառական գրականութեան քիչ ծանօթ ներկայացուցիչներէն մէկն է։ Այս հատորին երեք բաժիններուն մէջ հաւաքուած են մամուլի մէջ ցրուած կամ անտիպ մնացած գրութիւններ։ Առաջին բաժինը նուիրուած է Տարօնի վանքերու մանրամասն նկարագրութեան, որ մեծ արժէք կը ներկայացնէ այսօր մեծ մասով քանդուած յուշարձաններու պատմութեան համար։ Երկրորդ մասը Մշոյ Գեղամի ճամբորդական գրառումներն են՝ Մուշէն մինչեւ Կիլիկիա ու Թիֆլիս, իսկ երրորդ մասը կը կազմէ հայոց բնաշխարհի նուիրուած պատկերներ եւ յօդուածներ։
