ՊԱՒԵԼ ԼԻՍԻՑԵԱՆ (ծնունդ՝ 6 Նոյեմբեր, 1911)
Պաւել (Պօղոս) Լիսիցեան անցեալ դարու ամենէն յայտնի հայ անուններէն մէկը եղած է խորհրդային օփերային մէջ։
Ծնած է 6 Նոյեմբեր, 1911-ին, Վլատիկաւկազի մէջ (Հիւսիսային Կովկաս)։ 1930-ին մեկնած է Լենինկրատ (ներկայիս՝ Ս. Փեթերսպուրկ) երաժշտական իր ուսումը ստանալու։ Տարբեր տարիներու եղած է Լենինկրատի օփերային թատրոնի, Երեւանի օփերային թատրոնի եւ Մոսկուայի մեծ թատրոնի մեներգիչ մինչեւ հանգստեան կոչուիլը 1966-ին։ 1956-ին ստացած էր Խորհրդային Միութեան ժողովրդական արուեստագէտի կոչումը։ 1967-1973-ին դասաւանդած է Երեւանի Կոմիտասի անուան պետական երաժշտանոցին մէջ, սկիզբը՝ որպէս դասախօս, ապա՝ որպէս փրոֆեսոր եւ ամպիոնի վարիչ։
Լիսիցեանի լայնածաւալ ճկուն ու գեղեցիկ ձայնը յատկանշուած է հազուագիւտ թաւշեայ հնչեղութեամբ։ Ւր ամենէն նշանաւոր դերերգերը եղած են Չայքովսկիի, Վերտիի եւ Ռիմսկի Քորսաքովի օփերաներու մէջ։ Մեկնաբանած է նաեւ Չայքովսկիի, Ռախմանինովի եւ ուրիշ ռուս եւ հայ երգահաններու երգեր։ Ելոյթներ ունեցած է աշխարհի տարբեր երկիրներու մէջ, ներառեալ՝ Միացեալ Նահանգները, 1960-ին։
Պաւել Լիսիցեան մահացած է 6 Յուլիս, 2004-ին, Մոսկուայի մէջ։ Աղջիկները՝ Կարինէ եւ Ռուզաննա Լիսիցեան, եւ որդին՝ Ռուբէն Լիսիցեան, եղած են Մոսկուայի ֆիլհարմոնիայի մեներգիչները եւ ներկայիս կը դասախօսեն երաժշտական տարբեր դպրոցներու մէջ։ Թոռնուհին՝ դաշնակահարուհի Ելենա Լիսիցեան, կ՚ապրի Նիւ Եորքի մէջ։