Հին Երեւանը, Երուանդ Շահազիզ (թղթակազմ)

Երուանդ Շահազիզի 1931ին լոյս տեսած այս հատորը, որ կը վերակենդանացնէ շատերուն անծանօթ Երեւան մը, վերահրատարակուած էր 2003ին՝ լուսահոգի Մեսրոպ Արք. Աշճեանի ջանքերով։ «Ահա այս գիրքը եւ այս գիրքին նպատակը. ճանչնալ, սիրել, գուրգուրալ հին Երեւանին վրայ, կառուցել նոր Երեւանը», գրած է Սրբազան Հայրը իր յառաջաբանին մէջ։ Գեղատիպ այս երկրորդ հրատարակութիւնը առաջինի 31 նկարներուն փոխարէն ունի 120 լուսանկար։ Գիրքին սկիզբը զետեղուած է Թադէոս Յակոբեանի «Երեւանի պատմութիւն» քառահատոր աշխատութեան անգլերէն ամփոփումը, իսկ բոլոր լուսանկարները լոյս տեսած են հայերէն եւ անգլերէն մակագրութիւններով։ Գիրքին վերջը աւելցուած է Երուանդ Շահազիզի ինքնակենսագրութիւնը։