Թղթակցութիւն Մեծի Տանն Կիլիկիոյ Երեք Կաթողիկոսներու եւ Ամենայն Հայոց Կաթողիկոս Խորէն Ա․ Մուրադբէկեանի (թղթակազմ)

Կիլիկիոյ Կաթողիկոսութեան Արխիւներ Թիւ 3

Կիլիկիոյ Կաթողիկոսարանի արխիւներէն քաղուած այս հատորը կը բովանդակէ Սահակ Բ. Կաթողիկոսի (1903-1939), Բաբգէն Ա. Աթոռակից Կաթողիկոսի (1930-1936) եւ Գարեգին Արք. Յովսէփեանցի (ապագային՝ Գարեգին Ա. Կաթողիկոս, 1945-1952) թղթակցութիւնները Ամենայն Հայոց Կաթողիկոս Խորէն Ա.ի (1932-1938) հետ։ Նամակները կ՚ընդգրկեն 1920-1938 ժամանակաշրջանը եւ կը հանդիսանան այդ ժամանակի մեծ ու փոքր խնդիրներու հայելին։ Ինչպէս կը գրէ հատորի հրատարակիչ Գրիգոր Շահինեանը, «ժամանակակից մեր պատմութեան մէջ բացառիկ դերակատարութիւն ունեցող այս անձերու թղթակցութիւնը եւ անոր ընկերացող յաւելուածային գրութիւնները համադրական ու թելադրական մէկ պատկերը կը գծեն քսանական եւ երեսունական թուականներու մեր կեանքին։ Հոն պատկերուած կը տեսնենք Հայաստանեայց Եկեղեցիի կացութիւնը այդ տարիներուն, բայց նաեւ՝ ամբողջ հայութեան վիճակը Հայաստանի մէջ եւ Սփիւռքի, մա՛նաւանդ Սփիւռքի»։